onsdag 24. september 2014

Haustgåver til bursdagsbarn ♥

 To kjekke jenter har bursdag i disse dager og tante har lage "haustpakker",
beståande av hue, tøfler og sitteunderlag.

Det var ikkje enkelt å finne fargar som passa til alle tre delane her, fekk dei ikkje like når ein brukar ulik garnkvalitet, men pytt det fekk bli slik. Det mørkaste rosa settet gjekk veldig mykje betre...

 Huene er eit mønster som heiter "Café au lait Tam", ligg gratis på Ravelry (engelsk).
 Inspirasjon til å lage dei fann eg hos Christina's Handmade

Eg har brukt Merinoull frå Sandnes Garn, ca 1 1/2 nøste. Følgde oppskrifta på masketall og 
pinnestr. 3 og 3,5 men laga dei lengre enn det som stod, garnet er nok litt tynnare enn i oppskrifta,
 for det måtte vere såpass for å passe til 7-10 år.

 Tova tøfler etter ei oppskrift som har stått i eit eldre hefte frå Sandnes. 
Her har eg brukt Nepal garn frå Drops.

 Sitteunderlaga er etter ein grei oppskrift som lever sitt eige liv på nett, men som eg har lånt frå
 Eli Kristin: Skorpionens hjørne (som igjen fann den på nett ein annan plass.... :)

Eg tover på 50 grader i mi maskin, men det er visst store forskjeller på maskinene, 
så her er det lurt å kjenne maskina si litt trur eg!
Eg har nålefilta bokstavane etter toving.

  Har det veldig travelt for tida, strikkar på akkord og har litt for mange jern i elden, 
då blei korta av den enkle sorten denne gang! 



lørdag 20. september 2014

4H-sokken, med mønster!



 På høg tid med noko kreativt igjen her! 
4H- sokken laga eg i vinter, så det er på tide å få det med her!
Inspirert av andre sokkar eg har halde på med fann eg ut at eg måtte lage ein sokk med 4H logo, 
då eg er stor 4H-fan (klubbrådgjevar med eigen plakett ) og har datter som er medlem, og ho 
måtte jo få seg ein skikkeleg 4H-sokk!
Vil du vite meir om 4H finn du 4H Norge si heimeside  HER

  Sokken vart publisert i Kløverknekten som er medlemsbladet frå 4H Sogn og Fjordane, men 
det kan jo vere fleire over det ganske land som er interessert i mønsteret, så her kjem det!
(Obs! Vrangborden på bilde avviker frå den som er nytta i mønsteret, den er 
laga som heilt "vanleg" vrangbord)


4H sokken

Str.37-39
Garn som passer til pinne nr 3,5 (Her brukt Sterk frå Du Store Alpakka)
Garnforbruk: Naturkvit: ca. 100 gr. Grøn: ca. 150 gr. Grå: under 50 gr.
Arbeidet strikkes rundt.

Legg opp 64 m på settepinner nr 2,5 med naturkvit. Strikk vrangbord =2r 2vr i 4 cm. Bytt til settepinner nr 3,5. og rettstrikk samstundes som det fellast 4 m jamt fordelt = 60m. Fortsett med M1 (obs! Alle mønster skal lesast nedanifrå, frå høgre!) Strikk vidare M2. Pass på å felle der det er merka i mønster. Fortsett med M3. Etter M3 strikk med grøn tråd til arbeidet målar ca. 24 cm.
Hæl: Behald dei første 13 m til hæl, sett dei neste 23 m på ein tråd og behald dei siste 13m til hæl (=26m til hæl) fortsett med glattstrikk over desse 26 m til hæl ca. 5 cm. Sett eit merke midt på arbeidet.
Hælfelling:
1.p =retten: Strikk til det står att 7m, ta neste maske laus av p som om den skulle strikkast rett, 1r, løft den løse masken over, snu arb
2.p =vrangen: Løft første maske av som om den strikkes vr. Strikk til det står att 7 m, strikk dei to neste vr saman, snu arb
3.p = retten: Løft første m av som om den strikkes r. Strikk til det står att 6 m, ta neste m laus av som om den skulle strikkast rett, 1 r, løft den lause masken over, snu arb.
4.p =vrangen: Løft første m av som om den strikkes vr. Strikk til det står att 6 m,strikk dei to neste vr saman, snu arb.
Fortsett å snu og felle på same måte slik det står att ein maske mindre for kvar vending til det til slutt står att 14 m på pinnen.
Plukk så opp 11 m på kvar side av hælen og dei 26 resterande maskene på tråden settast tilbake på pinnane (No er det 18 m på kvar av dei to hælpinnane og 13 på kvar av dei to pinnane oppå foten)
Strikk rundt samtidig som det fellast 1 maske i kvar side annankvar omg slik: (pinne 1 er den som startar midt på hel bak) pinne 1: strikk til det står att 3 m, strikk dei to neste m rett saman, 1 r. Pinne 2 og 3 strikkes r, pinne 4: 1 r, løft neste m av pinnen som om den skulle strikkes r, 1 r, løft den lause masken over, resten av pinnen strikkes r. Fell slik annankvar omg til det står att 11 m på hælpinnane, løft over ein m til kvar av dei andre pinnane slik at alle pinnane har 12 m. Strikk vidare til arb måler 18-20 cm frå hælmerke (alt etter fotlengde, ca. 4 cm igjen til heil lengde)
Tåfelling: Fellast i kvar side av foten, på 1 omg slik: 1p: strikk til det står att 3 m på pinnen, 2 m r sm, 1 r.  2 p: strikk 1 r, 1 m laus av, 1 r og trekk den lause masken over strikk r pinnen ut. 3 p: strikk som 1 p. 4 p: strikk som 2 p. Fell på same måte kvar 2 omg tot 4 ggr. Deretter gjenta fellinga kvar omg til det står att 8 m. Trekk tråden gjennom dei siste maskene og fest godt.

Strikk neste sokk på same måte, MEN om du vil ha 4H logoen på utsida på begge sokkane må 4H mønsteret (M2) strikkast slik at du byrjar rett før siste kløver på sokk to.

 


Lykke til!
-Og du! Om du nyttar mønsteret og har blogg, så link gjerne til meg og legg gjerne igjen kommentar hos meg slik at eg får sjå DITT resultat!



Nordheia / Djupvikenipa

I går kveld var vi ein tur på Nordheia igjen, planen var å gå opp så pass seint at vi skulle få
med oss heile solnedgangen. Det har vore nokre fantastiske kveldshimlar i det siste og vi fann ut at vi måtte få med oss ein slik høgt til fjells. Men i kveld var altså kvelden det skulle skye til, så det vart ikkje heilt slik som vi hadde håpa på. Men ein fin tur likevel, og i dag kom regnet,
 så vi får vel sei oss fornøgd.

 Utsikt frå Djupvikenipa 650 moh. ut Førdefjorden, med Heilefjellet til venstre.

 Innskriving  i boka ved varden på Nordheia 662 moh.

 Kjekt å vere fleire på tur i lag!

Turvenner


fredag 12. september 2014

Fjelltur

 Blir ein del fjellbilde  her for tida, men det er berre så fantastisk ute, og må berre dele litt!
I dag vart det ettermiddagstur i nærområdet igjen. Vi er utruleg heldige så har all denne vakre naturen så nært! Turen gjekk til Sundsdalen / Kvanndalen og fjella der.

 Ein flott varde eg ikkje har namnet på, då eg ikkje er lokalkjend og heller ikkje finn namn på den på kartet. Men flott og firkanta var den, vi trudde først vi var komen på toppen og varden på Knausen, men fann ut på kartet at det ikkje var den,  og vi såg den òg eit godt stykke lenger inne, men det vart til at vi ikkje gjekk heilt fram, då tida begynte å bli knapp, og magen snart var klar for middag.....


 Vatnet her ligg på 694 moh

 Litt på kanten...

 Ganske så disig mot vest

 Ein fasinerande liten "varde" på vegen opp!
 Litt artig å sjå at den liknar litt forskjellig når ein ser den frå ulike vinklar

 Fann oss ein fin rasteplass på veg ned igjen

Heilefjellet med flotte Storehesten og Lisjehesten i framgrunnen.


søndag 7. september 2014

Nordheia - Friluftslivets dag

 I dag har det vore "Friluftslivetsdag" med ulike arrangement rundt om i landet.
Vi  tok ut på "eigahand" til Nordheiane i Førde. 
Det er ikkje langt frå der eg vaks opp, så fjella her er "heime".
Likevel er det faktisk første gang eg går til fots opp her, har berre gått her på ski tidlegare, så det var på høg tid å gå stien.
Turen er ikkje lang og heller ikkje av dei brattaste så det passa godt for 
eit trøblete kne som likar dårleg å gå nedoverbakkar.
 -Og ein får mykje "utsiktsvaluta" for pengane! ;)

Det var mykje vind på toppen, berre sjå på bikkja, he-he...., synast det var litt
 morosamt med den luftige bakoversveisen! :)
Vi gjekk vidare frå varden på Nordheia 662 moh. og bort på Djupvikenipa 650 moh. der utsikten vert enno betre mot fjorden.

Det var såpass vind i dag at vi måtte eit stykke ned att i lia for å ta nistepausen.
Det var ein blå-grå dag og det ber bilda preg av, men vi var heldige og slapp unna regn, det vart berre nokre få dropar, og litt meir når vi kom ned att til bilen. 
Berre eit par timar etterpå låg heile Nordheia frå vegen og heilt opp innhylla i tjukk tåke!
Så om sikten kunne vore klårare i dag, hadde vi trass alt flaks!

Tek med eit kart i dag òg om nokon er interessert (frå UT.no)
Har merka inn kor vi gjekk. Stien er ikkje merka, men heilt tydeleg frå parkeringsplassen (før tunnellen) og heilt opp! På toppen er det ein liten varde med moglegheit for å skrive seg inn i bok Ein startar altså på høgresida når ein kjem frå Førde. Det er ca 2 km til varden på fin sti. 
Ein fin tur når ein vil ha ein litt lettare "topptur" med flott utsikt!


lørdag 6. september 2014

Eikåsstølen

 I går ettermiddag vart det ein liten tur til Eikåsstølen i Jølster. 
Ein lett liten tur, men med fin utsikt litt opp i høgda.

Vêret var litt grått, men vi var heldige og slapp unna utan det heilt store av regn.
Litt lett yr rett etter vi starta, men så letta det litt og holdt seg fint til rett før vi satt oss i bilen igjen!
 
 Sheela var med å inspiserte utsikten mot vakre Jølster.
Det var traktorveg heilt opp til stølane, men vi valgte å gå litt lenger for å sjekke
 ut stien litt vidare og utsikten vart endå betre! Litt blåbær i magen vart det òg! :)

 Opp til stølane var det ca. 1 km lett oppover, så ein fin liten tur!

 Tek med eit lite kart (frå UT.no)
Vi tok av frå E39 ved Eikås og køyrde på den kommunale vegen oppover før vi etterkvart tok inn på grusvegen og parkerte der vegen gjekk over til "traktorveg" ved høgspentlina. 
Vegen oppover var merka med raude merker her og der (det var stien vidare oppover lia til fjells òg)